काठमाडौं - नेपाली कांग्रेसका वरिष्ठ नेता रामचन्द्र पौडेललाई प्रहरीले लिएको नियन्त्रण विरुद्ध नेपाल विद्यार्थी संघले विरोध प्रदर्शन गरेको छ।

संघका कार्यकर्ताले बुधबार साँझ माइतीघरमा विरोध प्रदर्शन गरेका हुन्। आकस्मिक रुपमा गरिएको विरोध प्रदर्शनमा संघका कार्यकर्ताले सरकार विरुद्ध नाराबाजी गरेका छन्।

गृहजिल्ला पुगेका पौडेलले व्यास नगरपालिकामा बनेको पुल उदघाटन गर्ने कार्यक्रम तय भएपछि नेकपा कार्यकर्ताले अवरोध गरेका थिए। प्रहरीले नेता पौडेललाई नियन्त्रणमा लिएको थियो।

दुई पक्षको झडपको स्थिति आउने सम्भावना देखिएपछि प्रशासनले पुल आसपासको क्षेत्रमा निषधाज्ञा जारी गरेको थियो। पौडेललाई तीन घण्टापछि प्रहरीले रिहा गरेको छ। पौडेललाई प्रहरी प्रशासनले गरेको व्यवहारको कांग्रेस पार्टी र नेताहरुले भर्त्सना गरेका छन्।

प्रहरीले तीन घण्टा नियन्त्रणमा लिएपछि पौडेल भने रिहा भइसकेका छन्।