काठमाडौं - राष्ट्रिय प्रजातन्त्र पार्टीको महाधिवेशन वैशाख २५ देखि २८ सम्म हुने भएको छ। राप्रपाको मंगलबार बसेको केन्द्रीय समितिको मंगलबार बसेको बैठकले एकता महाधिवेशन काठमाडौंमा गर्ने निर्णय पनि गरेको हो।

बैठकले राप्रपाको विधानलाई अन्तरिम विधान मानी निर्वाचन आयोगमा पार्टी दर्ता गर्ने कमल थापाले फेसबुकमार्फत जानकारी गराएका छन्। त्यस्तै, चुनावचिन्ह ‘हलो’ हुने, रातो, पँहेलो र निलो रंगको बीचमा ‘गाई’ रहेको झण्डा हुने पनि निर्णय गरिएको छ।

त्यस्तै, पार्टी एकता भएको ६ महिनापछि राष्ट्रिय प्रजातन्त्र पार्टीमा चुनाव चिह्नमा सहमति जुटेको छ। एकतालाई पूर्णता दिन सोमबार अध्यक्षत्रय पशुपतिशमशेर राणा, प्रकाशचन्द्र लोहनी र कमल थापाको बैठक बसेको थियो।

'चुनाव चिह्न हलो हुने सहमति भयो', राप्रपा नेता राजाराम बर्तौलाले भने।

गत फागुन २४ गते राप्रपा र राप्रपा संयुक्तबीच एकताका लागि आधार पत्रमा हस्ताक्षर भएको थियो। सोही अनुसार फागुन २९ मा पार्टी एकता भएको थियो। तर चुनाव चिह्न के हुने भन्ने विषयमा पूर्व दुई पार्टीबीच सहमति नजुट्दा एकताले पूर्णता पाउन सकेको थिएन।

एकताअघि थापा नेतृत्वको राप्रपाको चुनाव चिह्न गाई थियो। त्यस्तै राणा-लोहनी नेतृत्वको राप्रपा संयुक्तको चुनाव चिह्न हलो थियो।