एजेन्सी - भारतको राजस्तानस्थित कोटा जिल्लाको इटावा नजिकै बुधबार बिहान चम्बल नदीमा डुङ्गा पल्टदा ११ जनाको मृत्यु भएको छ भने ३ जना बेपत्ता भएका छन् । प्रहरीका अनुसार कमलेश्वर धाम जाँदै गरेका तिर्थयात्री बोकेको डुंगा पल्टिएको हो ।

मृत्यु हुनेमा ६ पुरुष, ४ महिला र एकजना बच्चा पनि छन् । घटनास्थलमा नदीको गहिराई ४० देखि ५० फिट थियो ।

डुंगा ओभरलोडका कारण पल्टिएको बताइएको छ। डुंगाको क्षमता २५ जना बोक्नसक्ने भएपनि ४० जना मानिस यहाँ चढेका थिए । त्यसमाथि १४ वटा बाइक पनि राखिएको थियो ।

घटनालगत्तै स्थानीयले यात्रुहरुलाई बचाउने कोसिस गरेका थिए । तर पानीको बहाव तेज भएका कारण केही मानिस बगेर बेपत्ता भए । यस दुर्घटनापछि घाइतेको उद्धार गर्ने क्रममा चार जना युवकले मिलेर कुल २५ जनाको ज्यान बनाएका छन् । उनीहरुका अनुसार डुंगावालाले धेरै मानिसलाई राख्न अस्विकार गरिरहेका थिए,तर मानिसहरुले जर्बजस्ती गरे । डुंगावाला पनि पौडेर बाँच्न सफल भएका छन् ।